PANGJAJAP ACARA DINA RARAGA AKAD NIKAH (BAHASA SUNDA)

Assalaamu’alaikum wr. Wb.

Alhamdulillahilladzi ahalannikah waharromassyifah….dst

Para bapa anu garandang anu sami lenggah !

Para ibu anu harurung nangtung anu sami rawuh !

Para hadirin anu garinding anu sami sami hadir !

Kumna kasugrining para wargi anu sarumping hormateun sim kuring !

“Dina mangsa rasa kebek ku kabungah anu sumarambah lebeting manah, teu aya kecap anu merenah kedal dina munggaran garapan, anging ti urang sami-sami manjatkeun puji anu suci nyanggakeun puja anu utama ka dzat anu Maha Kawasa Ilahuna Robbuna Allah Aza wajala anu salamina ngaping ngajaring ngayuga jeung ngaraksa ka manusa anu salamina takwa ka Mantena, mudah-mudahan diantawisna kalebet urang sadayana”.

“ Teu kakantun solawat  sinareng salam, paneda mugia salamina dilungsurkeun ku mantena kajungjunan urang sadaya, mustikaning sosoca dunya kangjeng rosulullah saw, anu parantos nuduhkeun jalan utama ka umatna sangkan di dunya hirup waluya di akherat pinanggih jeung bagja, teu kakantun mudah-mudahan didugikeun ka kulawargina, sohabatna, tabi’in tabiatna tug dugi kaurang sadayaan, aamiin ya mujibassaailin.

“Sajengna mangrupi lemek pangrampes, bewara pangbagea, sim kuring ngahturkeun wilujeng sumping, wilujeng tepang, wilujeng paamprok jonghok kalayan nyanggakeun rangkul panglawung ka kulawargi calon panganten pameget kalih rombongan, kalayan sim kuring gaduh paneda, mugia ku kasumpinganan para wargi sadaya ka ieu patempatan buktosna ka bumina kang….sing janten marga lantaran tambih-tambih nyaketkeun tali kawargian diantawis urang sadaya tur salamina aya dina ridoana Allah swt.

 Nanging…aya harewos ti sohibul maksad papatah mani lekoh ka sim kuring, kumaha atuh saurnah akang sareng euceu teh, wirehna ngumpulkeun dulur-dulur anu ti lembur, ngondang baraya anu ti kota teh bari heureut pakeun pungsat bahan, dibeber beber ge kalah ka soeh, para wargi ditampi calik mung ukur dibabancik, hempak dibaeukeun ditaweuran, kukituna tina sugrining katunaan, kalaifan panampian, boh dina tempat anu kirang saluyu sareng kakedahan, kirang tata titi, tata cara duduga peryoga kirang tatakrama anu utama, neda sihapuntena, mugia neda cukup lumur jembar panghampurana.

“Salajengna kanu rawuh mugia mafhum, kasadayana mugia janten uninga rehna dua nonoman buktosna

Neng….. sareng cep….., parantos sami-sami kajamparing ati, katalimeng katineung kapanah ku asmarana cinta, nya danget ieu pisan  aranjeuna seja maheutkeun galeu kadeudeuh, nyimpaikaeun ramat katresna, ngaiteun tali kaasih, rehna dina mangsa katukang aranjeuna parantos sasarengan na hanjuang nunda carita, na handeuleum neundeun kadeudeuh, dina ati nitip kaasih, dina manah papada nyimpen kanyaah, jajaka sareng nyi mojang parantos sami-sami tutup, tetep, titip. Tutup mangsana lalagasan, tutup mikahayang anu sanes. Tetep duanana jinis pada jinis parantos sami-sami jangji pasini mo bade paturay deui, papada pacantel cinggir ku karepna pribadi, netepkeun baris ngahiji teu kakantun widina ti para sepuh. Titip diri moal nitipkeun kanu sanes, parantos silih reumpeukan ku papateuh anu eunggeuh ku deungeun-deungeun, papada masang babay kingkila katara ku kadang warga yen geus suka pada suka mo incah balilahan deui, baris sapapait samamanis maksad seja ngahiji ngalaki rabi. Salajengna andum panuhun, pidu’a anu kaseja, mugia pamaksadan tinekanan kalayan aya dina kalancaran oge aya dina ridoana Allah swt. Aamiin.

‘Kanu rawuh mugia mafhum, sim kuring kajurung mancen garapan jadi pangduum waktu pangjajap acara, peryogi ngadugikeun rundayan acara anu baris kasanggakeun.

‘Munggaran mangrupa bubuka, diteraskeun kana pangaosan ayat suci al Qur’an, ditema seren sumeren ti sesepuh calon panganten pamaget, disambung ku panampian ti pribumi, Indung acara akad nikah kacangking ku khutbah nikah, salajengna panganteb lisan, kadeudeuh ka panganten, diwuwuh ku do’a mangrupi panglesu qalbu, dipungkas ku musopahah.

“Hadirin hormateun sim kuring anu sami rawuh, supados teu nyangkolong kana waktos, sumangga urang bujeng kana acara salajengna, nyaeta pangaosan aya-ayat suci al-Qur’an anu bade diaoskeun ku …….

“Sodakollohuladzim, wasodakorosuhul karim wanahnu alaa dzalika minassyyaahidiina wassyaakiriin, mudah-mudahan rahmat Allah swt oge barokah tina aosan ayat suci al-qur’an tadi didugikeun ku Allah swt khusus kanu ngaoskeunana umumna ka urang sadayana, wabil khusu utamina ka calon mempelai anu bade didahupkeun.

“Salajengna awon teu kapiunjuk, gaduh raos janten pribumi seja tumaros kanu rawuh, naon anu janten kandungan manah sajabina ti silaturrahmi ?, sumangga gera dadarkeun, sumangga geura wawarkeun, ka pupuhu ti rombongan calon panganten pameget sumangga dihaturanan kanggo ngadugikeun pamaksadanana.

“Alhamdulillah wasyukrulillah, nu dianti-anti ti kamari nu didago-dago tibareto, kasumpingan cep……kadieu bari diiring ku wargi-wargi ngaleut ngeungkeuy ngabandaleut ngebat-ngebat nyatang pinang, dijajap ku baraya bari rebo ku cacandakan sarta dijurung ku do’a sepuh sagemblengna parantos disanggakeun, nembe pisan ku urang sadaya parantos ka kuping cep….sagalana parantos di pasarahkeun ka kulawargina calon panganten istri, getihna satetes, rambutna salambar, ti luhur sausap ketu ti handap sausap sapatu, ti tengah-tengah anu sagede mutu, kaseneng ibu-ibu, dimana ibu-ibu teu mendak dina sajero saminggu ibu-ibu sok murukusunu, kumargi si ibu hoyongeun cau. He….he….he…..

Para wargi hormateun sim kuring, wabil khusus ka kulawargi calon panganten pameget, sim kuring asamana sohibul maksad ngahaturkeun sewu nuhun laksa keti kabingahan raos kugunturan madu karagragan menyan putih, kaweningan galih para wargi, kajembaran manah kadang warga moal disuhun dina emun-emunan sok inggis lsok inggis laas kaibunan, moal dikeupeul dina dampal leungeun sok bilih kakumbah, moal disimpen di handap sok inggis palid ku cileuncang, nanging baris dibungkus dina qalbu, dipatri dina ati, ditetepkeun dina angen supados salamina kacipta, karaos, kacatet ku kertegna hate.

“Salajengna kanggo ngantebkeun panampian seja kadugikeun ku pangeresa…….. waktos sinareng kahormatan sumangga dihaturanan.

“Batu turun keusik naek, itu purun ieu daek, jinis pada jinis pada sapuk, ibu rama pada-pada rujuk, nu nyanggakeun sareng anu nampi papada gumulung dina hiji kacindekan seja bade bebesanan rumojong kana kahoyong putra.

“Kanggo perlambang lulus banglusna ieu seren sumeren, sumangga pada nyakseni, serah papasrahan cacandakan, mangrupi pangbobot panyandang raga ti ibuna cep…..ka  biangna neng…….sumangga ka ibuna cep….dihaturanan kanggo nyanggakeun salah sawios cacandakan nana ka ibuna neng……

“Para bapa miwah para ibu anu sami rawuh !

Jangji pasini anu bihari, pasang subaya anu baheula, antawis dua nonoman, ayeuna parantos nitih wancina, tumiba ninggang dimangsa, bade di tali kaitkeun seja dicangreud pegeuhkeun ku akad nikah kasimpay ku khutbah nikah, kanu mancen garapan bapa-bapa para petugas ti KUA sumangga waktos sareng kahormatan salaluasan disanggakeun……….

“Alhamdulillah dua insan hamba Allah anu ngagaduhan cit-cita mulia ayeuna parantos resmi janten suami istri, urang do’akeun ku urang sadayana mudah-mudahan aranjeuna sing tiasa ngawangun rumah tangga anu sakinah mawadah warohmah, kacai jadi saleuwi ka darat jadi salebak, ka cai sing daraek mandi ka darat sing daraek solat, oge mudah-mudahan diparekeun rizkina di tebihkeun balaina, kalayan dipaparin pala putra anu soleh tur solihah anu tiasa ngabaktikeun dirina ka Allah swt oge ka kedua orang tuana, murangkalih anu berguna kanggo agama, nusa sareng bangsa.

“Kanggo pangdeudeul ka kedua mempelai, pangeresa al mukarom………..seja ngadugikeun lisan kadeudeuh, mangrupi panyiram kanu nembe ngarangkadak beukah oge kanu tos mangsana ligar, mugi-mugi ageung manfaatna. Panuhun ka KH………kanggo ngadugikeun lisan kadeudeuhna.

“Nutup saur mungkas maksad, panuhun kanu Maha Agung, paneda kanu Maha Kawasa, cara do’a seja disesepuhan ku pangeresa KH……

“Alhamdulillah garapan mangsa lekasan, kasugrining anu sarumping dihaturanan kanggo ngawilujengkeun ka panganten, salajengna ngbujeng meja tuangeun, “Nyanggakeun sabrang salayan, kalebet cabe mah henteu, nyanggakeun hatur lumayan kalbebet sae mah henteu”.

“Sateu acan amit mundur amit mungkur pamungkas ti sim kuring anu mancen garapan jadi pangduum waktu pangjajap acara sejak sandu-sanduk, bobo sapanon carang sapakan, bilih aya saur anu teu ka ukur aya basa anu teu kareka, anu matak tidekluk kana qalbu, matak rengat kana manah, matak bared kana hate, sok inggis ti poros dina nyarios, ti soledat tina kecap, palias ka hareup neukteuk saleunjeur ka tukang nigas saregang, paneda mugia balungbang timur jalan gede sasapuan, caang bulan opat welas, ulah aya geuneuk maleukmeuk, tepung bayu duduluran baraya sapapanjangna, hatur punten tina sanes kanten kakiranganana,

“ Subhanakalloohu wabihamdika asyhadu alla ilaha illa anta……..dst

“Wassalamu’alaikum wr.wb.